تره‌مپ یان شاسوار
یه‌كه‌م زنجیره‌ی به‌رنامه‌ی (هه‌نگاوی یه‌كه‌م) له‌لایه‌ن شاسوار عه‌بدولواحید و ستافێكی گه‌نجه‌وه پێشكه‌ش ده‌كرێت، كه ئه‌وه‌ش هاوشێوه‌ی به‌رنامه‌یه‌كی ته‌له‌فیزیۆنی (دۆناڵد تره‌مپ)ه كاتێك كه پێشكه‌شكاری به‌رنامه‌یه‌كی ته‌له‌فیزیۆنی بوو له ئه‌مریكا.
تره‌مپ له چه‌ند ساڵی رابردوودا جگه له‌وه‌ی سه‌رمایه‌داربوو، پاشای شاشه بوو له ئه‌مریكا، له به‌رنامه‌یه‌كی ته‌له‌فیزیۆنیدا كه له كه‌ناڵی NBC به‌ناوی (The Apprentice) واته* (شاگرد یان مه‌شقپێكراو) په‌خشده‌كرا.. تیایدا تره‌مپ ره‌مزی پیاوێكی بزنسمانی خاوه‌ن كاریزمابوو، به‌وه ناسراوبوو قسه‌ی زۆر ره‌ق و ناشرینی به‌رامبه‌ر به‌شدارانی به‌رنامه‌كه‌ی ده‌كرد و ده‌یشكاندن.
ئه‌و به‌رنامه‌یه كه 14 وه‌رزی لێ پێشكه‌شكرا، ده‌یان گروپی گه‌نج و خه‌ڵكی به‌هره‌داری ئه‌مریكا به‌شدارییان ده‌كرد و پڕۆژه‌یان پێشكه‌ش ده‌كرد و كێبڕكێیان بوو بۆئه‌وه‌ی خه‌ڵاتی گه‌وره‌ی (تره‌مپ - THE DON) به‌ده‌ستبهێنن و ببنه خاوه‌نی پڕۆژه‌ی وه‌به‌رهێنان، ئه‌و كه‌سانه‌ش كه له‌به‌رنامه‌كه‌دا شایسته نه‌بونایه پێی ده‌وتن؛ "You are Fired- تۆ ده‌ركرایت" و هه‌ندێكجار لێیان توڕه ده‌بوو، ده‌یشكاندن له‌به‌رئه‌وه‌ی نه‌یانتوانیوه گروپی كار به‌ڕێوه‌به‌رن.
كاتێكیش تره‌مپ ویستی خۆی كاندید بكات بۆ پۆستی سه‌رۆكایه‌تی ئه‌مریكا، زۆرینه‌ی گه‌نجی ئه‌مریكا ده‌نگیان پێدا، له‌به‌رئه‌وه‌ی چه‌ندین ساڵه خۆی وه‌كو نمونه‌یه‌كی باڵا خستبوه‌ڕوو... ئه‌گه‌رچی سیاسی نه‌بوو، به‌ڵام توانی ستراتیژی كاركردنی خۆی بۆ به‌ڕێوه‌بردنی كه‌مپینی هه‌ڵبژاردنه‌كه‌ی به‌سه‌ركه‌وتوانه ئه‌نجام بدات ئه‌گه‌رچی دوژمنی زۆربوو له‌ناو تیمه‌كه‌ی خۆشیدا.
ئه‌وه له ئه‌مریكا. به‌ڵام له كوردستان به‌ڕێز؛ شاسوار عه‌بدولواحید، كه خاوه‌نی كۆمپانیای نالیایه و به‌رنامه‌یه‌كی نوێ پێشكه‌ش ده‌كات به‌ناوی (هه‌نگاوی یه‌كه‌م) به‌هه‌مان ستایلی ئه‌و به‌رنامه‌یه‌یه... به‌ڵام له‌كاتی چاوپێكه‌وتنه‌كانیدا، نه‌خۆی باسی ده‌كات و نه راستگۆیانه خواستی خۆی راگه‌یاندووه بۆ هاتنه دنیای سیاسه‌ته‌وه.
مرۆڤ زۆر ئاساییه رێگای جیاواز و ئه‌زمونكراو بۆ ئامانجه‌كانی خۆی هه‌ڵبژێرێت، به‌ڵام كاتێك بابه‌تێك په‌یوه‌ندی به مافی گشتیی و بواره كۆمه‌ڵایه‌تییه‌وه‌كه‌وه هه‌بوو، باشتره ئه‌مانه‌ت و راستگۆیی له گوتاردا بپارێزرێت.
ئێمه هه‌مومان بینیمان روماڵی كه‌ناڵی نالیا بۆ سه‌ركه‌وتنی ترامپ، و جۆری ته‌حریری هه‌واڵه‌كانیان بۆ هه‌ڵمه‌تی هه‌ڵبژاردنی ترامپ، له‌شێوه‌یه‌كدا ره‌نگیدایه‌وه كه رێگا بۆ به‌ڕێزێكی دیاری كۆمپانیای نالیا خۆشبكرێت بۆئه‌وه‌ی خه‌ڵكی كوردستان له هه‌ڵبژاردنه‌كانی داهاتودا ده‌نگ بده‌ن به‌و كاندیده‌ی پێشتر بزنسمان بووه، ئه‌گه‌رچی سیاسی نه‌بووه.
خیتابی دركپێكراوی ناو هه‌واڵه‌كانی كه‌ناڵی نالیا ئه‌وه‌بوو كه بۆ خه‌ڵكی بسه‌لمێنێت كه "هه‌میشه بزنسمان كه ده‌بێته سیاسی، سه‌ركه‌وتوو ده‌بێت، به‌ڵام كاتێك سیاسییه‌ك ده‌بێته بزنسمان شكستخواردوو ده‌بێت".
له‌به‌رئه‌وه عه‌یب نییه ئه‌گه‌ر راستگۆیانه به خه‌ڵك بڵێی بۆچی ده‌ته‌وێت زیاتر ببیته كه‌سایه‌تییه‌كی گشتی، چونكه بۆ نه‌وه‌ی نوێ سیفه‌تی پێشمه‌رگایه‌تی كۆن یان به‌شداریكردن له راپه‌ڕین...هتد له‌گۆڕێ نه‌ماون و پێویسته رێگای نوێ بدۆزرێته‌وه.
تێبینی؛ كلیك له‌و پیته هاوپێچكراوانه بكه بۆ بینینی به‌رنامه‌كه‌ی ترامپ
تێبینی؛ كلیك له‌و پیته هاوپێچكراوانه بكه بۆ بینینی به‌رنامه‌كه‌ی ترامپ
